Imajući u vidu sudbonosni uticaj broja 18 na našu domovinu, a time i na njene sinove i šćeri, predlažem da se tome broju zatre svaki trag kod nas i kod svake naše i najdalje svojte u domu i u rodu, u rasijanju i đe god se broji, sabira i oduzima.

Tako, od sada pa ubuduće, nijedno dijete neće sticati punoljetstvo sa 18 godina, jer te godine nikada imati neće. Punoljetsvo će se brojati kad se napuni 17, a inicijacija u zrelost će, jednako kod ženskinja i muškinja, biti skok preko ponora 18.

Uradiće se reforma kalendara tako da se iz svakog mjeseca izbaci 18. dan, a iz stoljeća 18. godina, a iz eona 18. stoljeće.

Đe god bi 18 trebao da stoji u nekom brojčanom poretku, prišivaće se korotu radi žalosti i opomene.

Ako se neka radnja ponavlja više puta, treba strogo voditi računa da ona bude svršena prije 18. Kada tako što nije moguće, onda na 18 treba zastati i jeknuti: Oooooog nama, oooooog! Tako treba činiti i kad 18. put prinesemo kašiku ustima i kad bilo šta drugo uradimo.

Ništa ne smije imati ovu dužinu, a posebno ne ona muška rabota. Ko bude uhvaćen u prekršaju, biće predat na dalje postupanje Agenciji za mjere i standarde.

Napomena: Predlog rezolucije je otvoren za amandmanske intervencije.