Na tri godine i mjesec dana zatvora osuđen je Oguz Guven, urednik internet izdanja turskog opozicionog lista Džumhurijet. Optužen je za pribjegavanje “terorističkoj propagandi”.

Guven je optužen zbog poruke na Tviteru da je u saobraćajnoj nesreći poginuo tužilac koji je podnio prvu optužnicu protiv mreže propovjednika Fetulaha Gulena, prenijela je Beta.

U poruci koja je brzo obrisana rečeno e da je tužilac bio “pokošen”.

Guven je pravno odgovoran za Tviter nalog lista.

Sud u Istanbulu je u obrazloženju presude naveo da sporna Tviter poruka predstavlja propagandu za Gulenov pokret, koji Turska smatra odgovornim za prošlogodišnji propali puč. Gulen, koji živi u SAD, demantuje svaku umiješanost.

Očekuje se da će Guven uložiti žalbu na presudu.

Nekoliko zaposlenih u listu Džumhurijet su odvojeno na sudu zbog navodnog podržavanja terorističkih grupa.