Trideset tri lava spasena iz cirkusa u Peruu i Kolumbiji poslata su nazad u Južnu Afriku, kako bi ostatak života proveli u jednom privatnom utočištu.

Najveći vazdušni transport lavova do sada je organizovala grupa Međunarodni branitelji životinja (Animal Defenders International – ADI), sa sjedištem u Los Andjelesu.

Organizacija ADI je nekoliko godina saradjivala sa poslanicima u Peruu i Kolumbiji kako bi se zabranilo korišćenje divljih životinja u cirkusima, gdje se često drže u užasavajućim uslovima, prenosi Beta.

Dugotrajno putovanje životinja počelo je u četvrtak u Kolumbiji, gdje je karavan s prvih devet lavova otišao iz grada Bukaramanga vozeći se 14 sati do Međunarodnog aerodroma u Bogoti. Odatle su ukrcani u teretni avion kojim su letjeli do glavnog grada Perua, gdje je preuzeto još 24 lavova.

Letjelica s lavovima uputila se ka Južnoj Africi u petak uveče.