Predsjednik Upravnog odbora Instituta alternative Stevo Muk je upozorio danas Skupštinu Crne Gore  da je “na putu da prekrši Zakon o Državnoj revizorskoj instituciji (DRI) i kompromituje imenovanje Savjeta Agencije za sprječavanje korupcije”, jer je Odbor za antikorupciju juče većinom glasova podržao i kandidata za člana Savjeta Agencije za sprječavanje korupcije “čijim bi se imenovanjem direktno prekršio Zakon o Državnoj revizorskoj instituciji”.

“Komisija i Odbor su podržali kandidaturu g. Radula Žurića, dugogodišnjeg državnog revizora u Državnoj revizorskoj instituciji. Odredbama Zakona o Državnoj revizorskoj instituciji, koje uređuju sprječavanje sukoba interesa, izričito je  zabranjeno članstvo državnih revizora u organima upravljanja pravnih lica (Član 41 i 45). To je zabrana koja važi za članove Senata DRI, a shodno se primjenjuje i na državne revizore”, upozorio je Muk u izjavi dostavljenoj medijima.

Muk je napomenuo da Skupština  može podržati Žuriča  jedino ukoliko on, u međuvremenu, podnese ostavku na svoje radno mjesto u DRI.