Kopilot Germanwingsa, njemački državljanin Andreas Lubitz, prema prvim nalazima istrage o rušenju aviona airbus A 320 na liniji Beselona – Dizeldorf, u utorak je namjerno oborio avion u kojem je bilo 150 ljudi.

Ovo je danas na konferenciji za novinare saopštilo tužilaštvo u Marselju, nakon što je preslušan snimak tzv. crne kutije.

“Kopilot Andreas Lubitz je posljednjih deset minuta sam bio u kabini. Sigurno je bio živ jer se čuje kako normalno diše. Nije rekao ni riječi. Drugi pilot ga je iza vrata molio da ga pusti unutra. Nekoliko puta je i zaplakao”, ispričao je tužilac Brice Robin iz Marselja.

U posljednjim sekundama na snimku čuju se vriskovi putnika. “Mislimo da su tek tada shvatili što se događa”, objasnio je. Na kraju leta čuje se alarm koji upozorava na blizinu tla, prenose agencije.

Kopilot je bio zaključan u pilotskoj kabini i nije dozvolio kapetanu aviona, koji je na trenutak bio izašao iz kabine, da se vrati unutra, nego je namjerno obrušio avion sa namjerom da ga, kako su rekli, “uništi”.

Lubitz, koji je imao 28 godina, kako je saopštio tužilac Robin, nije bio poznat vlastima sa spiska mogućih sumnjivih terorista.

“Ne mogu to nazvati suicidom“, takođe je rekao tužilac Robin, prenosi RSE.

Lufthansa je ranije objavila, bez navođenja imena pilota, da se kopilot Germanwingsa kompaniji pridružio 2013, odmah nakon obuke i da je imao 630 sati leta.

Njemački stručnjak za vazdušni saobraćaj Gerold Wissel je rekao za agenciju DPA da piloti prolaze stroge psihotestove na početku letačke karijere. Kasnije idu na redovne medicinske preglede, ali nemaju redovne testove ličnosti.

Lufthansa, kao i ostale kompanije, ima jasne smjernice za članove posade koji moraju prijaviti čudno ponašanje kolega. To se može učiniti i anonimno. Zaposleni su obavezni da alarmiraju na najmanji znak alkoholizma, depresije ili psihološke nestabilnosti, prenosi Al Džazira.