Ljudi koji su pobjegli od rata, nasilja i jada, usred Njemačke su ostavljeni na milost i nemilost sadistima i rasistima, piše štampa nakon saznanja da obezbjeđenje izbjegličkih domova maltretira azilante.

Mladi Alžirac oboren je na pod i vezan lisicama. Uniformisani čovek pritiska svoju cipelu na vrat nesrećnika, kolega samo čuči pored. Poziraju za kameru mobilnog telefona. Fotografije koje su šokirale Njemačku predstavljene su sinoć medijima, piše Dojče vele.

Poprište skandala je dom za azilante u Burbahu, varošici na zapadu zemlje. Mučitelji su pripadnici privatne firma za obezbjeđenje SKI, angažovane da čuva izbjegličke domove.

“Gledajući ove fotografije, lako se u sjećanje prizivaju mučiteljski poduhvati američkih vojnika u Iraku. Cilj je poniženje mučenog”, piše Vestfalenpost (Hagen).

Zapadnonjemački javni servis WDR javio je da problema nema samo u Burbahu, već i u Esenu i drugim smještajima u Sjevernoj-Rajni Vestfaliji – koje takođe vodi European Homecare. Pa ni tu nije kraj – saznaje se da brojni bezbjednjaci firme SKI imaju debele dosijee u policiji.

“Scenario je uznemiravajući – ljudi koji su pobjegli od rata, nasilja i jada u svojim domovinama naišli su na sadističke mučitelje usred Njemačke”, piše kelnski “Štat ancajger”.

“Slike kojima su počinioci dokumentovali svoja nedjela nose nešto od simbolike Gvantanama ili iračkog zloglasnog zatvora Abu Graiba. Počinioci nemaju ni trun obzira. Fotografije su nastale usred naše Sjeverne Rajne-Vestfalije, i svi mi bi trebalo da se stidimo jer naša zemlja očigledno nije u stanju da bolje štiti izbjeglice koje su već u svojim domovinama doživjele previše zla, piše “Rajniše post”.