Nadzor nad sprovođenjem javnih nabavki ostaje zabrinjavajući, a jačanje ove kontrole je jedan od preduslova za unapređenje borbe protiv korupcije i mjerilo za napredovanje u procesu pregovora u okviru poglavlja 23 – Pravosuđe i temeljna prava, ocijenila je danas Jovana Marović iz Institut alternative (IA) na sjednici Odbora za anrikorupciju Skupštine Crne Gore.

Kontrola postupaka i ugovora o javnim nabavkama nalazi se u nadležnosti Uprave za inspekcijske poslove u kojoj je zaposlen samo jedan inspektor za javne nabavke.

U 2013. godini nije zabilježena nijedna prijava za korupciju u javnim nabavkama, dok su se tri prijave odnosile na sukob interesa, a još uvijek nema pravosudne odluke za korupciju u javnim nabavkama, navodi IA.

Manjak transparentnosti, između ostalog, postoji zbog nedostupnosti svih zaključenih ugovora na portalu javnih nabavki, kao i nemogućnosti uvida u neposredne sporazume.