Specijalni tužilac EU Džonatan Ratel je izjavio da je Moše Harel, osumnjičen za organizovanje trgovine organima, uhapšen u Izraelu.

Ako informacija bude potvrđena, ovo hapšenje bi moglo biti prekretnica na suđenju sedam osoba, optuženih za trgovinu organima i nelegalne transplantacije u klinici “Medikus” 2008. godine u Prištini, navodi AFP, prenosi RTS.

Harel je uhapšen u Prištini te iste godine, ali je pobjegao sa Kosova čim je pušten iz pritivora. Kosovske vlasti su poslije toga izdale međunarodni nalog za njegovo hapšenje.

Prema optužnici, u prištinskoj klinici je 2008. godine obavljeno najmanje 30 nelegalnih vađenja i presađivanja bubrega.

U optužnici se izraelski državljanin Harel navodi kao “mozak” mreže koja je pronalazila davaoce i dobitnike organa.