Crnogorski ministar vanjskih poslova Milan Roćen je tokom današnje  posjete  Prištini najavio da će Crna Gora sledeće godine otvoriti ambasadu na Kosovu, kao i da će se privesti kraju pitanje demarkacije granica izmedju dvije države.

On je takođe iznio i lično  mišljenje o ideji podjele Kosova koja se posljednjih dana sve više čuje u medijima.

"Ja mislim da je prošlo vrijeme podjela i vrijeme crtanja novih granica na ovim našim prostorima. Svi oni koji sanjaju takve snove, bili oni u Srbiji, u Crnoj Gori, na Kosovu ili u Albaniji, mislim da samo gube vrijeme. Mislim da je zauvijek prošlo vrijeme velikodržavnih projekata i velikodržavnih ideja na ovim prostorima koje nikada nikome dobra nisu donijele. A svjedoci smo svi mi upravo procesa koji su se odigrali posljednjih 20-tak godina na prostoru bivše Jugoslavije", kazao je Roćen.

Roćen se sastao sa predsjednicom Kosova Atifete Jahjagom i svojim kolegom Enverom Hoxhajem, prenosi RSE.

Sa Roćenom, u Prištini su danas boravili i ministri pravde Duško Marković i predsjednica Vrhovnog suda Vesna Medenica.