Prvi radni dan u ovoj godini i prvi dan trgovanja na jedinstvenoj Montenegroberzi obilježio je promet od 609.860 eura, koji je realizovan kroz 75 sklopljenih poslova, prenosi ekonomski portal SEEbiz.

Kompanijski indeks MONEX20  je povećao vrijednost 0,66%  – na 14.618 poena, dok je indeks koji prati kretanje fondova MONEXPIF pao  2,68%  – na 6.596 poena.

Današnje trgovanje obilježile su akcije Mimoze (MIMO) čiji je promet iznosio 388.713 eura, sa prosječnom cijenom od 1,0231, kao i akcije Absolute Bar (ABSO), kojima je prometovano 150.000 eura, uz cijenu od 1,00 eura.

Akcije Crnogorskog Telekoma (TECG) su zabilježile promet od 19.099 eura, uz rast od 0,92%  – na 3,5927 eura, dok je akcijama Kontejnerskog terminala i generalnih tereta (KOGE) trgovano u iznosu od 7.669 eura, uz povećanje vrijednosti od 6,92%  – na 0,6399 eura. Pad od 38,33% – na 0,0073 eura zabilježile su akcije Izbora Bar (IZBR) uz promet od 3.788 eura.

Promet realizovan obveznicama iznosio je 5.514 eura, od čega se 3.514 eura odnosi na obveznice Fonda za restituciju FO02, čija je cijena pala 11,31% – na 0,3104 eur. Akcijama investicionih fondova je danas trgovano u vrijednosti od 15.146 eura i najveći promet ostvarile su akcije Monete (MONF) u iznosu od 13.523 eura, uz prosječnu cijenu od 0,0795 eura.