Nakon što ih je jutros bacio vjetar 300 metara od Prevlake, u hrvatske vode, ribari iz Zelenike, Zoran Živanović (36) i njegov 16-ogodišnji bratanić, završili su u zatvoru u Dubrovniku, a njihov ribarski brod u Moluntu, javlja Radio Jadran.

“To su međunarodne vode, bacilo ih je more, nisu nikakvi kriminalci da budu uhapšeni. Prije deset minuta sam se čuo sa unukom. Žao mi je to dijete, da ono bude u zatvoru. Samo mi je rekao da čekaju sudiju i da će im uzeti telefon da više ne mogu da pričaju. Vjerovatno će im biti izrečene kazne. To je sramota. Da budu uhapšeni, za šta? Pa toliko ima hrvatskih jahti i brodova što ulaze ovamo u zaliv i niko ih ne dira. Toliko sam ljut i razočaran”, rekao je za Radio Jadran Branko Živanović, otac Zoranov.